Sumqayıt ilə H.Z. Tağıyev qəsəbəsi arasında olan yolun 4 zolağa genişləndirilməsi üzrə işlər yekunlaşdırılır. Sumqayıt24 bu barədə 5 avqust tarixində Aayda.gov.az-a istinadən xəbər verir.
Məlumata görə, genişləndirilən hissənin uzunluğu 13,7 km-dir. Tikinti işləri zamanı yolun mövcud eni 15 m-dən 23-26 m-ə, hərəkət hissəsinin eni isə 7-10 m-dən 15 m-ə qədər genişləndirilib.
Belə ki, marşrut boyu mövcud örtüyün sökülməsi, torpaq yatağının təbii relyef səviyyəsinə qaldırılması və genişləndirilməsi, yeni torpaq yatağının və yol əsasının inşası, geriyə dönmə hissələrin işlənməsi, yolun yaşayış məntəqəsi daxilindən keçən hissəsində piyada səkilərinin və yeni işıqlandırma sisteminin yaradılması, yolayrıcına dəmir-beton maneələrin düzülməsi işləri artıq yekunlaşıb.
Həmçinin, yolun 8-ci km-də layihələndirilən bir aşırımlı körpünün kənar dayaqlarının və beton aşırımların inşası, digər hissədə isə kommunikasiya xətlərinin köçürülməsi işləri də artıq bitib.
Sadalanan işlərlə yanaşı burada uzunluğu 30, eni isə 3.5 metr olan yerüstü piyada keçidi inşa edilib. Hazırda layihə boyu son mərhələ üzrə yeni asfalt-beton örtüyünün döşənməsi işləri icra olunur.
