Pirşağı-Novxanı-Xırdalan yolunda uzun fasilədən sonra tikinti başlayıb. Sumqayıt24 bu haqda 13 sentyabr tarixində Xezerxeber.az-a istinadən xəbər verir.
İşlər ətrafda yaşayan sakinlərin narazılığına səbəb olub. Onlar iddia ediblər ki, tikinti prosesi çox ləng gedir. Ərazi qışda palçıq, yayda isə toz olur.
Yolun hər iki tərəfində məskunlaşan insanlar alternativ yolların olmadığını deyirlər. Onlar bildirirlər ki, tikintiyə 2015-ci ildən başlanılıb, lakin sonradan işlər yarımçıq qalıb.
Narahatedici məsələlərdən biri də üstüaçıq quyulardır. Təxminən 2-3 metr dərinliyi olan bu quyuları qaranlıqda görmək mümkün deyil.
Azərbaycan Avtomobil Yolları Dövlət Agentliyindən məsələ ilə bağlı bildirilib:
“Tikilən yolun əhəmiyyətini nəzərə alaraq, sözügedən avtomobil yolunun layihələndirilməsi və tikintisi hissə-hissə aparılır. Açıq hava şəraitində tikinti aparıldığı üçün meteoroloji amillər nəzərə alınır. Bəzi günlərdə, bugünkü kimi, iş müvəqqəti dayandırıla bilər. Yolun tikintisinin hələ bir neçə il davam edəcəyi nəzərdə tutulub”.
