Saray qəsəbəsinin H.Z. Tağıyev küçəsində antisanitar vəziyyət müşahidə olunur. Bu haqda 21 avqust tarixində Sumqayıt24 Report.az-a istinadən məlumat verir.
Qəsəbə sakinlərinin sözlərinə görə, sözügedən küçədə kanalizasiya xətləri mütəmadi olaraq dolub-daşır. Axan çirkab küçə boyunca gölməçələr yaradır. Ərazini xoşagəlməz iy bürüyür.
“Azərsu” ASC-nin ictimaiyyətlə əlaqələr şöbəsinin əməkdaşı Neyman Səfərəliyev bildirib ki, mövcud kanalizasiya xətləri vətəndaşlar tərəfindən kustar üsulla, fərdi qaydada çəkilib: “Ərazidə mərkəzləşdirilmiş kanalizasiya infrastrukturu mövcud deyil. Belə vəziyyət yarandıqda “Azərsu” ASC sakinlərə köməklik göstərir, xəttin açılması, işlək vəziyyətə gətirilməsinə yardım edir. Qəsəbədə mərkəzləşmiş kanalizasiya infrastrukturunun qurulması ilə bağlı layihələr var və bunlar gələcəkdə dövlət investisiyaları hesabına həyata keçiriləcək".
