Novxanı yolunda baş verən qəzada 4 nəfəri öldürən Elşad Kəlbəliyevin kassasiya protesti üzrə məhkəmə olacaq. Sumqayıt24 bu haqda 8 yanvar tarixində Oxu.az-a istinadən xəbər verir.
Ali Məhkəmədə keçiriləcək proses yanvarın 9-na təyin edilib. Hökmdən verilən şikayət hakim Ələsgər Novruzovun sədrliyi ilə araşdırılacaq.
Xatırladaq ki, hadisə 14 iyun 2021-ci ildə Binəqədi-Novxanı yolunda baş verib. Kəlbəliyevin 90 km/saat sürətlə sürdüyü “Land Rover” markalı avtomobillə Murad Ziyadovun idarə etdiyi “Daewoo Damas” markalı avtomobil toqquşub. Nəticədə ehtiyatsızlıqdan “Daewoo Damas”ın sürücüsü M. Ziyadov, sərnişinləri – Kamran Əhmədov, Elman Şıxəliyev və Yunis Mürsəlov ölüblər. Eyni zamanda, “Daewoo Damas” yararsız vəziyyətə düşüb, ona 7000 manat maddi ziyan vurulub.
Məhkəmənin hökmü ilə E. Kəlbəliyev 9 il müddətinə həbs olunub. Bununla razılaşmayan məhkum apellyasiya şikayəti verib. Bakı Apellyasiya Məhkəməsi şikayəti qismən təmin edib. Kəlbəliyevin cəzası 8 ilə endirilib.
Ali Məhkəmənin qərarına əsasən isə aşağı instansiya məhkəməsinin çıxardığı hökm tamamilə ləğv edilib. İş baxılması üçün Bakı Apellyasiya Məhkəməsinə göndərilib. Nəticədə Elşad Kəlbəliyevin cəzası 8 ildən 5 ilə endirilib. Hökmdən narazı qalan prokurorluq kassasiya protesti verib.
