Sumqayıtda qəsdən sağlamlığa yüngül zərər vurmada təqsirləndirilən Səməd Əkbərova (şərti) hökm oxunub. Bu haqda 23 noyabr tarixində Sumqayıt24 Pravda.az-a istinadən məlumat verir.
Hakim Samir İsmayılovun sədrliyi ilə keçirilən proses Sumqayıt Şəhər Məhkəməsində baş tutub. Məhkəmənin hökmü ilə işə xitam verilib və o, cinayət məsuliyyətindən azad edilib.
İttihama görə, hadisə bu il şəhər ərazisində yerləşən evlərin birində qeydə alınıb.
Belə ki, Səməd Əkbərov evdə olan zaman həyat yoldaşı Dünya Ələkbərova (şərti) ilə aralarında şəxsi münasibətlər zəminində mübahisə yaranıb. Nəticədə o, şüşə bakal ilə qadının ayağından, ventilyatorla isə kürəyindən vuraraq, onun sağlamlığına yüngül xəsarət yetirib.
Məhkəmə iclasında Səməd Əkbərov elan olunmuş ittiham üzrə özünü təqsirli bilərək ifadəsində göstərib ki, həyat yoldaşı Dünyadan yemək istəyib, qadın ona özünün bişirdiyi yeməyin olmadığını deyib. Mübahisə də elə bunun üstündə baş verib. O, bundan sonra arvadını vurduğunu bildirib.
