Sumqayıtda ağlasığmaz dələduzluğun detalları bəlli olub. Sumqayıt24 bu haqda 22 noyabr tarixində Sumqayit.tv-yə istinadən xəbər verir.
Hadisə keçən ilin may və iyun aylarında baş verib. Məlumata görə, Vüsal Məmmədov adlı şəxs Seymur və Novruz adlı şərikləri ilə (adlar şərtidir – red.) ƏDV-çek maxinasiyası qurub. Onlar realda mövcud olmayan dükanların 5 ədəd kassasını “açıblar”.
Hər kassa gündə 1 milyon 200 min manata yaxın çek vurub. Onlar özlərini avtodetal satıcısı kimi qeyd ediblər. Bu üsulla 2 aya vergidən 2 milyon 500 min manat pul çıxarıblar.
Məlumata görə, dəstə üzvləri gündüzlər “kassa”da virtual çek vurub, axşamlar isə telefonla ƏDV-ni götürüblər.
“4 nəfər Sumqayıt şəhərində 6-cı mikrorayondakı evdə işləyib. Onlar Natiq (Vüsalın xalası oğlu), İlkin və qardaşı (Vüsalın ikinci arvadından olan oğulları) və Namiq adlı şəxsdir. Ziyafət (Vüsalın baldızı oğlu) isə öz evində işləyirmiş. Natiq, iki qardaş, bir də Namiq hərəsi bir ay işlədiklərinə görə 3 min manat pul alıblar. Ziyafətə isə şəriklər hansısa səbəbdən 30 min manat veriblər. Natiq indi Fəqan adlı dostu ilə “sosial ev” düzəltmək adı ilə Bakıda camaatı aldatmaqla məşğuldur. Hər ay məhkəmələrdədir. Bütün evlərini ikinci arvadının və qayınanasının adına keçirib. Maşınları da qardaşının, oğullarının adındadır”, – deyə mənbə bildirib.
