Bir neçə gün əvvəl Sumqayıtda ağır yol qəzası törətmiş 28 yaşlı S.Cəbiyevin cinayət işi üzrə məhkəmə prosesi başa çatıb. Bu haqda 8 yanvar tarixində Sumqayıt24 Publika.az-a istinadən məlumat verir.
Sumqayıt Ağır Cinayətlər Məhkəməsində hökm oxunub. Cəbiyev Cinayət Məcəlləsinin “Sürücülük hüququ olmadan ölümlə nəticələnən yol-nəqliyyat hadisəsi törətmə” maddəsi ilə təqsirli bilinib.
O, daha əvvəl də ölümlə nəticələnən yol qəzası törədib. Bu əmələ görə o, sürücülük hüququndan məhrum edilib və 5 il müddətinə azadlıqdan məhrum edilib.
Cəzasını məntəqə tipli cəzaçəkmə müəssisəsində çəkən gənc oğlan tez-tez icazə alaraq müəssisəni tərk edirmiş. Belə icazələrdən birini alaraq cəzaçəkmə müəssisəsindən çıxan şəxs qanunsuz olaraq idarə etdiyi “Ford” markalı avtomobillə nəvəsi ilə birgə yolu keçən Şabran sakini Zülfiyyə Abışovanı vurub. Nəticədə piyada aldığı xəsarətlərdən hadisə yerində ölüb. Nəvə isə ciddi xəsarət almayıb.
Məhkəmə bu dəfə Qubadlı rayon sakini olan 28 yaşlı S.Cəbiyevə 6 il 6 ay müddətinə həbsxanada saxlanma və bundan sonra 5 il müddətinə sürücülük hüququnun məhdudlaşdırılması hökmü verib.
Daha əvvəl məntəqə tipli cəzaçəkmə müəssisəsində saxlanılan gəncin cəzasını ümumi rejimli cəzaçəkmə müəssisəsində çəkəcəyi də qeyd edilib.
