Gənc soydaşımız “Meta” şirkətində (Facebook) tədqiqatçı alim kimi çalışır. Sumqayıt24 bu barədə Modern.az-a istinadən xəbər verir.
Cəfər Cəfərov Sumqayıtda hərbçi ailəsində doğulub. Orta təhsilinə 23 saylı məktəbdə başlayıb, Sumqayıt Özəl Türk liseyində davam etdirib. Ali təhsilinin bakalavr və magistr pillələrinə Türkiyənin Boğaziçi Universitetində, doktoranturaya isə Çikaqo Universitetində (ABŞ) yiyələnib. O, kompüter mühəndisliyi ixtisası üzrə oxuyub.
Sumqayıtlı kadr süni intellekt sahəsində Türkiyənin öndə gedən isimlərindən olan Cem Say ilə işləyib. Onlar apardıqları elmi araşdırmanın nəticəsi olaraq, İtaliyada keçirilən beynəlxalq konfransda məqalə dərc ediblər.
Cəfər hazırda “Meta”da maşın öyrənməsi sahəsində fəaliyyət göstərir. O, öz sahəsində barmaqla göstəriləcək insanlardan olmaq, qazandığı təcrübəni Azərbaycanda tətbiq etmək istədiyini bildirib. [modula id="25355"]
