Sumqayıt şəhərində 8 Noyabr – Zəfər Günü ilə əlaqədar təşkil olunan "Zəfərin rəngi" adlı tədbirdə "44 Zəfər Plakatı" rəsm sərgisi açılıb.
Report.az-ın məlumatına görə, tədbirdə Sumqayıt şəhər rəhbərliyi, şəhid ailələrinin üzvləri, qazilər, deputatlar, ictimaiyyət və media nümayəndələri iştirak ediblər.
Tədbirin əvvəlində 44 günlük Vətən müharibəsində Azərbaycan Ordusunun qəhrəmanlıq səhnələrinin, azad edilmiş şəhər və kəndlərin görüntülərinin, eləcə də şəhidlərin xatirəsinin əbədiləşdirilməsinin əks olunduğu videoçarx nümayiş etdirilib.
Daha sonra tədbirin rəsmi hissəsi çərçivəsində "44 Zəfər Plakatı" adlı rəsm sərgisinin açılışı olub.
Yekunda tədbir iştirakçıları "44 Zəfər Plakatı" adlı rəsm sərgisinə baxış keçiriblər. Sərgidə nümayiş olunan əsərlərdə Vətən müharibəsindəki birlik, mübarizə ruhu və Qələbə sevinci bədii şəkildə ifadə olunub. Bildirilib ki, sərgidə təqdim olunan bütün rəsmlər Sumqayıt şəhər məktəblərinə hədiyyə ediləcək.
