Sumqayıt Dövlət Universitetində (SDU) təhsil layihəsi başlayıb. Sumqayıt24 bu haqda 6 may tarixində xəbər verir.
Layihə kimya mühəndisliyi üzrə yeni magistr proqramının yaradılması ilə bağlıdır. SDU-nun rektoru Rüfət Əzizov bildirib ki, inkişaf edən Azərbaycana yeni ixtisaslara yiyələnmiş savadlı kadrlar lazımdır:
“Azərbaycan neft-qaz ölkəsi olduğu üçün kimya mühəndisliyi ixtisası xüsusilə vacibdir. Sənayenin tələblərinə uyğunlaşdırılmış yeni tədris proqramına kimyəvi proseslər, istehsal prosesləri və ekoloji dayanıqlılıq kimi sahələr daxildir. Proqramın təlim materialları xüsusi olaraq Sumqayıt şəhərinin sənaye və texnoloji müəssisə və şirkətlərinin ehtiyacları üçün hazırlanıb”.
BP şirkətinin Xəzər və Yaxın Şərq regionunda kommunikasiya və xarici əlaqələr üzrə vitse-prezidenti Bəxtiyar Aslanbəyli vurğulayıb ki, bu layihə mütəxəssis hazırlığının biznes və sənaye ehtiyaclarına uyğunlaşdırılması istiqamətində növbəti uğurlu təşəbbüsdür:
“Kimya mühəndisliyi ixtisasına digər şəhərlərdən daha çox məhz Sumqayıtda ehtiyac duyulur. Ölkənin kimya potensialının mühüm hissəsi məhz Sumqayıtda yerləşir. Layihə bütövlükdə ölkə iqtisadiyyatı üçün kimya sənayesinin əhəmiyyətinin artdığı bir vaxtda həyata keçirilir. Bu baxımdan ümid edirik ki, proqramın məzunları müasir texnoloji biliklərə, çevik qabiliyyətlərə, innovativ bacarıqlara yiyələnəcək, ən əsası isə doğma şəhərlərinin və ölkənin sənaye tendensiyalarının və iqtisadi inkişaf planlarının həyata keçirilməsi səylərinə böyük həvəs və enerji ilə qoşulacaqlar”.
Bundan əlavə, mütəxəssislər də proqram haqqında danışıblar.
Çıxışlardan sonra proqramla tanışlıq olub. Bildirilib ki, yeni magistr proqramına ilkin olaraq “Əsas üzvi sintezin kimyası və texnologiyası” və “Polimerlərin kimyəvi texnologiyası” üzrə 15 tələbə qəbul olunacaq.
Gələcəkdə isə proqram genişləndirilərək əlavə dörd sahəni əhatə edəcək və növbəti beş il ərzində qəbul sayı ümumilikdə 95 nəfərə çatdırılacaq.
