Sumqayıtlıya yüksək vəzifə həvalə olunub. Sumqayıt24 bu haqda 19 fevral tarixində Sumqayit.tv-yə istinadən xəbər verir.
İqtisadiyyat naziri Mikayıl Cabbarov əmr imzalayıb. Əmrə əsasən, Sahibkarlığın İnkişafı Fondunun idarə heyətinin sədri vəzifəsini müvəqqəti olaraq Osman Xaliyev icra edəcək.
Məlumata görə, Osman Xaliyev 2021-ci ildən idarə heyəti sədrinin müavini olub. Buna qədər isə o, sədrin müşaviri vəzifəsində çalışıb.
Təcrübəli kadr 1985-ci ildə Sumqayıt şəhərində anadan olub. 2007-ci ildə Azərbaycan Dövlət İqtisad Universitetinin İqtisadi kibernetika ixtisası üzrə bakalavr, 2010-cu ildə isə İdarəetmənin informasiya texnologiyası üzrə magistratura pilləsini bitirib. 2012-2014-cü illərdə ABŞ-nin Brandeis Universitetində MBA ixtisası üzrə oxuyub.
O. Xaliyev 2010-2012-ci illərdə “Access Bank” QSC-də əməliyyatlar üzrə mütəxəssis, Azərbaycan Respublikasının Mərkəzi Bankında mütəxəssis olaraq fəaliyyət göstərib.
2014-2015-ci illərdə ABŞ-nin Boston şəhərində yerləşən "Global Atlantic Partners LLC” şirkətində məsləhətçi vəzifəsində işləyib. 2016-2020-ci illərdə kənd təsərrüfatı və qida sənayesi sahələrində fəaliyyət göstərən bir sıra şirkətlərdə biznesin inkişafı üzrə menecer və direktor vəzifələrini icra edib.
