Sumqayıtda 46 yaşlı Bəhruz mübahisə zamanı həyat yoldaşı Səbinəyə (adlar şərti göstərilib - red.) xəsarət yetirib. Sumqayıt24 bu haqda 2 aprel tarixində Oxu.az-a istinadən xəbər verir.
Kişinin barəsində Cinayət Məcəlləsinin 128-ci (qəsdən sağlamlığa xəsarət yetirmə) maddəsi ilə ittiham elan edilib.
Bəhruz ifadəsində özünü ittiham üzrə təqsirli bilib. O qeyd edib ki, təxminən 13 ildir Səbinə ilə ailə həyatı qurub:
“Bu evlilikdən bir qızımız və bir oğlumuz olub. Evlilik dövründə dəfələrlə aramızda mübahisələr olub. Sonuncu dəfə hadisə günü, axşam saatlarında işdən evə gələn zaman həyat yoldaşım Səbinənin mobil nömrəsinə dəfələrlə zəng vurdum. Daha sonra nömrəmin əngəlləndiyinin şahidi oldum. Bundan sonra evə gəldim. Evə girən zaman Səbinənin mətbəxdə oturaraq telefonla danışdığını gördüm. Bu zaman Səbinə oturduğu yerdən ayağa durdu. Ondan telefonunu mənə verməsini istədim. Səbinə telefonu verməkdən imtina etdi. Telefonda anası ilə olan danışıqlarını siləcəyini dedi”.
Təqsirləndirilən şəxs qeyd edib ki, daha sonra Səbinəni yerə yıxaraq telefonu əlindən alıb:
“Bunu etməyimin səbəbi kiminlə danışmasının mənə maraqlı olması olub. Telefonu götürüb qonaq otağına keçdikdə Səbinə cibimdən telefonu götürərək hamama girdi. Evdə uşaqlar olduğu üçün bundan sonra daha məsələni uzatmadım. Təxminən beş dəqiqə sonra hamamdan çıxaraq telefonu mənə verdi. Onun telefonda olan mesajları silmək istəməsi məndə şübhə yaratdı. Əsəbiləşib ona şillə vurdum. Evdə uşaqlar olduğu üçün beş-altı şillə zərbəsi vurduqdan sonra dayandım. Bundan sonra Səbinənin qardaşına telefonda olan mesajları silməsi, mənə göstərməməsi barədə məlumat verdim”.
Bəhruz bildirib ki, ertəsi gün səhər saatlarında Səbinədən uşaqları götürərək anasının yaşadığı evə getməsini tələb edib. Onun sözlərinə görə, həmin gündən Səbinə gedib.
Zərərçəkmiş Səbinənin sözlərinə görə, Bəhruz ilə aralarında dəfələrlə mübahisələr olub:
“Bu dövr ərzində Bəhruz bir dəfə də olsun evin problemləri ilə maraqlanmayıb. Sonuncu dəfə hadisə günü, axşam saatlarında istifadə etdiyim telefonda nömrəsinin əngəllənməsinə görə Bəhruz evə gələrək mübahisə yaratdı. Mən də istəyərəkdən əngəlləmədiyimi, telefonumun qızımızda olduğunu, onun bilmədən edə biləcəyini dedim. Bundan sonra yumruq və şillə zərbələri ilə başımdan, sifətimdən vurdu. Sonra məni yerə yıxaraq bədənimin müxtəlif nahiyələrindən vurdu. Döyən zaman ağzımdan qan gəldi və dişim qırıldı. Daha sonra uşaqlarımla birlikdə məni evdən qovdu. Bundan sonra sosialdan aldığım müavinətin kartı Bəhruzda olduğu üçün evdən çıxdıqdan sonra kartı dəyişdirdim. Daha sonra Bəhruz məndən kartı geri qaytarmağımı istədi”.
Bu cinayət işinə Sumqayıt Şəhər Məhkəməsində baxılıb. Məhkəmənin hökmü ilə Bəhruzun azadlığı 10 ay müddətinə məhdudlaşdırılıb.
Təqsirləndirilən şəxsin üzərinə Sumqayıt Şəhər Probasiya Şöbəsinə məlumat vermədən saat 22:00-dan növbəti gün saat 07:00-dək yaşadığı ünvanı tərk etməmək, Abşeron rayonu, Sumqayıt və Bakı şəhərlərinin hüdudlarından kənara çıxmamaq, elektron nəzarət vasitəsini gəzdirmək və həmin vasitənin işlək vəziyyətdə saxlanılması üçün ona xidmət etmək, məhkəmə qərarı olmadan yaşayış yerini dəyişdirməmək, cəzanın icrasına nəzarət edən orqanı iş yerinin dəyişdirilməsi və ya işə düzəlməsi barədə əvvəlcədən məlumatlandırmaq vəzifələri qoyulub.
