H.Z. Tağıyev qəsəbəsinin sakinləri küçənin işıqlandırılmamasından çətinlik çəkirlər. Bu haqda 28 mart tarixində Sumqayıt24 Real TV-yə istinadən məlumat verir.
Əliağa Vahid küçəsinin sakinləri bildirirlər ki, ərazi uzun illərdir işıqlandırılmır. Məhəllədə olan bir-iki ev sahibi özü üçün işıq çəksə də, o da əksər vaxtlar sönülü olur.
Şikayətçilərin çoxsaylı müraciətlərindən sonra yalnız 32 nömrəli məktəbin yerləşdiyi ərazi işıqlandırılıb.
“Uşaqlar məktəbdən çıxanda hava qaralır. İşıq sistemi yoxdur. İkinci növbədən uşaqlar çıxanda çox əziyyət çəkirlər”, – deyə sakinlər söyləyiblər.
Məsələ ilə bağlı Sumqayıt şəhər İcra Hakimiyyətinin mətbuat katibi Eyvaz Qocayev münasibət bildirib:
“Sumqayıt şəhərində küçələrin işıqlandırılması ilə bağlı tədbirlər planı mövcuddur. Mərhələli şəkildə həyata keçirilən layihə nəticəsində şəhərin əksər hissələrində bu işlər artıq yekunlaşıb. İşıqlandırmaya ehtiyac olan digər küçələrdə də tədbirlərin görülməsi nəzərdə tutulub. Yaxın gələcəkdə bu işlər qeyd olunan küçədə də həyata keçiriləcək”.
