Sumqayıtda gəlini və nəvəsini baltalamaqda təqsirləndirilən Şahbala Mirzəməmmədovun məhkəməsi başlayır. Bu haqda 13 sentyabr tarixində Sumqayıt24 Report.az-a istinadən məlumat verir.
İşə Sumqayıt Ağır Cinayətlər Məhkəməsində baxılacaq. Hakim Hafiz Əliyevin sədrliyi ilə keçiriləcək məhkəmənin hazırlıq iclası sentyabrın 25-nə təyin edilib.
Xatırladaq ki, hadisə bu ilin mart ayında baş verib. İttiham aktına görə, Ş.Mirzəməmmədov gəlini, 40 yaşlı Sevinc Məhərrəmovanı və 9 yaşlı nəvəsini baltalayıb.
Qonşular qeyd ediblər ki, hadisə qadının 3 azyaşlı uşağının gözləri qarşısında baş verib. Köməyə yetişən qonşular yaşlı kişinin əlindən baltanı alıb, yaralıları isə xəstəxanaya yerləşdiriblər.
Sumqayıt Tibb Mərkəzindən verilən məlumata görə, neyrocərrahiyyə şöbəsində müalicəsi davam etdirilən xəstələrin vəziyyəti orta-ağır olaraq qiymətləndirilib.
Ş.Mirzəməmmədov Cinayət Məcəlləsinin “xüsusi amansızlıqla qəsdən adam öldürmə” maddəsi ilə ittiham elan edilib və barəsində məhkəmənin qərarı əsasında həbs qətimkan tədbiri seçilib.
