Sumqayıtda tanışının qətlində təqsirləndirilən Azər Dadaşovun məhkəmə hazırlıq iclası olub. Sumqayıt24 bu haqda 2 noyabr tarixində xəbər verir.
Sumqayıt Ağır Cinayətlər Məhkəməsində hakim Nahid Mirzəyevin sədrliyi ilə keçirilən prosesdə anket məlumatları dəqiqləşdirilib. İş üzrə məhkəmə baxış iclası dekabrın 14-nə təyin edilib.
Hadisə 17 dekabr 2022-ci ildə baş verib. Corat qəsəbəsi ərazisində 1989-cu il təvəllüdlü Cavid Şirməmmədov aldığı bıçaq xəsarətlərindən dünyasını dəyişib. Faktla bağlı Sumqayıt şəhər prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb.
Araşdırma zamanı Şirməmmədovun tanışı, qəsəbə sakini, 1985-ci il təvəllüdlü Azər Dadaşovun münaqişə zamanı onu bıçaqlayaraq qəsdən öldürməsinə əsaslı şübhələr müəyyən edilib.
Azər Dadaşov şübhəli qismində tutulub.
