Bacısını qətlə yetirən 25 yaşlı Nicat Əsədovə hökm oxunub. Bu haqda 19 sentyabr tarixində Sumqayıt24 Qafqazinfo.az-a istinadən məlumat verir.
Sumqayıt Ağır Cinayətlər Məhkəməsində cinayət işi üzrə məhkəmə prosesi yekunlaşıb. N.Əsədov Cinayət Məcəlləsinin “xüsusi amansızlıqla adam öldürmə” maddəsi üzrə təqsirli bilinib. Məhkəmənin hökmü ilə təqsirləndirilənə 15 il həbs cəzası verilib.
Qeyd edək ki, ötən ilin 25 sentyabr tarixində N.Əsədov bacısı, 29 yaşlı Xalidə Əsədova ilə mübahisə edib. O, bacısının evə gec gəlməsindən əsəbiləşərək onu öldürmək qərarına gəlib. Gecə saat 2:00 radələrində X.Əsədova 7 yaşlı oğlu ilə özünə məxsus avtomobillə yaşadığı evə gəlib. Orada gözləyən Nicat qadına hücum edərək azyaşlı övladının gözü önündə bacısına çoxsaylı bıçaq zərbələri endirib. Ağır xəsarətlər alan qadın hadisə yerində vəfat edib.
