Sumqayıtda küçədə keçmiş arvadı Günel Qurbanovanı (ad-soyad şərtidir) döyən Ənvər Mehdiyevə (ad-soyad şərtidir) hökm oxunub. Bu haqda 2 fevral tarixində Sumqayıt24 Qafqazinfo.az-a istinadən məlumat verir.
Hökmə əsasən, Ə.Mehdiyevin azadlığı 5 ay 26 gün müddətinə məhdudlaşdırılıb.
Hadisə ötən il baş verib. Cütlüyün nikahı pozulsa da, Günel bir müddət keçmiş ərinə məxsus evdə qalıb, daha sonra bacısıgilə köçüb. Bu müddətdə Ənvər hər axşam Güneli işdən götürüb evə aparıb. Günel evə avtobusla gedib və Ənvər bundan əsəbiləşib, bundan başqa, boşanmalarına baxmayaraq, qadının şəxsi həyatına müdaxilə edilib. Nəticədə yaranan mübahisə zamanı kişi qadını küçədə döyüb.
Zərərçəkən məhkəmədən keçmiş ərinin bu davranışlarına qadağa qoyulmasını xahiş edib.
Nəticədə Ənvərin Günelə, həmçinin yaşadığı evə 50 metr məsafədə yaxınlaşması, onunla hər hansı formada, o cümlədən rabitə vasitəsi ilə əlaqə saxlaması və ünsiyyətə girməsi qadağan edilib.
