Sumqayıtın, hətta Azərbaycanın gəlmiş-keçmiş ən məşhur qruplarından olan “Yuxu” 1988-ci ildə yaradılıb. Bu barədə Sumqayıt24 xəbər verir.
Kollektivin üzvləri tez-tez yuxularında özlərini artıq tanınmış və bacarıqlı musiqiçilər kimi görürdülər. Bu səbəbdən qrupun yaradıcısı bas-gitaraçı İbrahim Emin məhz “Yuxu” adını təklif edib.
Onlar ilk çıxışlarını “Kimyaçılar” sarayında ediblər. “Xəzərin sahilində” mahnısı isə onları daha da məşhurlaşdırdı. Mahnının sözlərini İbrahim Eminin atası yazıb. O. Apa.az-a müsahibəsində bildirmişdi:
“Mən sözlərə atamın icazəsi ilə bəzi düzəlişlər etmişəm. Məsələn, orada “Xəzərin sahilində” əvəzinə “Sumqayıt bağlarında” yazılmışdı”.
“Xəzərin sahilində” mahnısına klip çəkməyə isə keçmiş “ANS” televiziyasının prezidenti Vahid Mustafayev köməklik göstərib. Klipin premyerası elə həmin televiziya kanalında baş tutub.
1989-cu ildə “Yuxu” “Qızıl Payız” festivalının qalibi olub. Festivaldan sonra onlar İstanbula yollanıb və qısa müddət ərzində tanınmağa başlayıblar. Türkiyəyə ilk dəfə gələndə qrup üzvlərinin ümumilikdə 100 dolları olub. Qazanc üçün onlar İstanbulun Laləli qəsəbəsində dəri gödəkcələr satılan mağazada işləyiblər. Bu zaman “Xəzərin sahilində” klipini fransız xanım Paskal görüb. Onları Fransada fəaliyyət göstərməyə dəvət edib. Lakin Fransada müvəqqəti yaşamaq üçün sənədləri ala bilməyən rokçular Türkiyədə qalıblar.
“Yuxu”nun ilk iki albomu Azərbaycanda yazılsa da, bütün albomlar (“Xəzərin sahilində” – 1988-ci il, “Sumqayıt” – 1994-cü il, “Ölümə çarə yox” – 1998-ci il) ilk dəfə Türkiyədə yayımlanıb.
1999-cu ildə İstanbulda baş verən zəlzələdən sonra Türkiyədə musiqi sahəsində böhran yaşanıb. 2001-ci ildə isə “Yuxu” qrupu fəaliyyətini dayandırıb.
Qrup üzvləri fərqli sahələrdə işləməyə başlayıblar. Vokal ifaçısı Zaur Abdullayev Moskvaya köçdü, zərb alətləri ifaçısı Çingiz Eyvazov Bakıda tatu sənəti ilə məşğul olmağa başladı, gitaraçı Namiq Nağdəliyev İstanbulda qalaraq öz musiqi fəaliyyətini fərqli türk qruplarında davam etdirdi. “Yuxu” qrupunun yaradıcısı, bas-gitaraçı İbrahim Emin isə doğma Sumqayıta qayıtdı və 2004-cü ildə “Sirr” qrupunu yaratdı. O, 2 iyul 2019-cu ildə Sumqayıt şəhərində vəfat edib.
