Su çərşənbəsi - Novruzun ilk çərşənbəsi sayılır. Bu çərşənbəyə “əvvəl çərşənbə”, “gözəl çərşənbə”, “sular Novruzu”, “gül çərşənbə” də deyirlər.
Su - bolluq, təmizlik və aydınlıq rəmzidir. Su ilə əlaqədar olan ənənələr Azərbaycanda təzə illə bağlıdır. Qədim inanclara görə, təzə ildə axar suyun üstündən tullanmaqla keçən ilin günahları yuyulur. Bundan əlavə, Su çərşənbəsi günü axar sudan keçənlər il boyu xəstəliklərdən uzaq olarlar.
Bu çərşənbə masa üzərinə, adətən, su qoyarlar. Əgər süfrəyə su tökülərsə, həmin ilin bol bərəkət gətirəcəyi ehtimal edilir.
Su çərşənbəsində qadınlar, qızlar su falına baxırlar. Həmin gecə subay qızlar bir evə yığışırlar. Bu mərasimi icra etmək üçün axar sudan - bulaqdan, yaxud çaydan əvvəlcədən su götürülür. Falda istifadə olunan suya “lal su” deyirlər. Bu suyu gətirməyə bir və ya bir neçə nəfər gedir. Suyu gətirən qabı əlinə götürəndən sonra su falına baxılacaq qaba tökənədək danışmaq olmaz. Əks-halda həmin su ilə fal açmaq doğru sayılmır.
