Sarayda 14 mərtəbəli yaşayış binasında yanğınla nəticələnən partlayış baş verib. Bu haqda 26 fevral tarixində Sumqayıt24 Fövqəladə Hallar Nazirliyinə (FHN) istinadən məlumat verir.
Hadisə binanın 12-ci mərtəbəsində 2 otaqlı mənzildə qeydə alınıb. Partlayış dalğasının təsirindən mənzilin pəncərə çərçivələri yerindən çıxıb.
Nəticədə binanın həyətində park edilmiş “Hyundai” markalı avtomobilə ziyan dəyib, mənzilin giriş qapısının yerindən çıxması nəticəsində binanın sərnişin və yük liftlərinin qapıları deformasiyaya uğrayıb.
Mənzilin bir otağı 20 kv.m sahədə yanıb. Yanğınsöndürənlər tərəfindən müxtəlif dərəcəli bədən xəsarətləri almış ev sahibi, 24 yaşlı F.Həsənzadə xilas edilərək təcili tibbi yardım briqadasına təhvil verilib, 25 nəfər bina sakini təxliyə edilib.
Digər mənzillər yanğından mühafizə olunub.
Faktla bağlı araşdırma aparılır.
