STP-də xanımlar üçün təcrübə keçiriləcək

“Zərif mühəndislər” xanımların inkişafı layihəsi həyata keçirilir. Sumqayıt24 bu haqda 9 aprel tarixində xəbər verir.

Proqram Təhsilin İnkişafı Fondu və STP Şirkətlər Qrupu tərəfindən təşkil olunub. Başlıca məqsəd yüksək akademik göstəricilərə malik, texniki sahələr üzrə fərqli ixtisaslarda oxuyan tələbə qızların təhsilinə, onların peşəkar mütəxəssis kimi yetişdirilməsinə dəstək göstərməkdir.

Layihə çərçivəsində 50 qız tədris ilinin sonuna qədər STP Şirkətlər Qrupunun xüsusi təqaüdünü alacaq. Habelə onlara mentorluq, təcrübə və təlimlər keçiriləcək.

Namizədlərin seçimi onlayn müraciət, qiymətləndirmə və müsahibə mərhələsindən ibarət olacaq. Seçim zamanı akademik göstəricilər və motivasiya məktubu nəzərə alınacaq. Yekun seçimdə müsahibə zamanı göstərilən nəticə əsas götürülür. Müsahibədə namizədlərə hədəfləri, sosial vəziyyəti, fəaliyyəti, tələbə həyatı ilə bağlı suallar veriləcək.

Təqaüd proqramı üçün Mexanika mühəndisliyi, Maşın mühəndisliyi, Mexatronika və robototexnika mühəndisliyi, Proseslərin avtomatlaşdırılması mühəndisliyi, Geomatika və geodeziya mühəndisliyi, Sənaye mühəndisliyi, Ekologiya mühəndisliyi və Elektrik və elektronika mühəndisliyi ixtisasları müəyyən edilib.

Proqrama link vasitəsilə müraciət etmək lazımdır: https://forms.gle/TfEchHxsCjuLijCt8. Son tarix 30 apreldir.

Namizədlərə tələblər:

• Azərbaycan Respublikasının vətəndaşı olmalıdır;


• Azərbaycan Respublikasının elmi-müəssisə və təşkilatlarında əyani təhsilalma forması üzrə 3-4-cü kurs bakalavr və ya hazırda magistr təhsili almalıdır;


• Yuxarıda qeyd olunan ixtisaslar üzrə oxumalıdır;


• Ali təhsil müəssisəsinin bakalavr pilləsinə minimum qəbul balı 300, magistr pilləsinə isə 60 olmalıdır;


• Ümumi orta müvəffəqiyyət göstəriciləri 80%-dən yuxarı olmalıdır;


• Dərsdənkənar fəaliyyətdə aktiv olmalıdır (könüllü, sosial fəaliyyət və s.);


• Aşağıdakı sosial kriteriyalardan birinə uyğun olmalıdır:

1. Ünvanlı dövlət sosial yardımı alan ailələrin üzvü;


2. Valideynləri olmayan və ya uşaq evində böyümüş şəxslər.

• Hər iki valideyni (tək valideyni olduqda isə həmin şəxs) aşağıda qeyd olunan kateqoriyaların hər hansı birinə aid olan şəxs:

1. I, II və ya III dərəcə əlilliyi müəyyən edilmiş şəxslər;


2. İşsiz kimi qeydiyyatda olanlar;


3. İş yeri olmayan və yaşa görə əmək pensiyası alanlar;


4. İş yeri olmayan və yaşa görə sosial müavinət alanlar.

Qeyd edək ki, fondun digər təqaüd proqramından yararlanmış şəxs bu layihəyə müraciət edə bilməz.