“Sumqayıt-2” klubu cəzalandırılıb. Sumqayıt24 bu haqda 9 aprel tarixində xəbər verir.
Xəbər verdiyimiz kimi, əvəzedicilər çempionatın 29-cu turunda “Neftçi-2”nin qonağı olublar. “Sumqayıt-2”-nin 5 futbolçusu sarı vərəqə aldığı üçün AFFA İntizam Komitəsi klubu 70 manat cərimələyib.
Həmçinin rəqibin futbolçusu Ağadadaş Salyanski də 4 oyunluq cəzalandırılıb. O, 90+5-ci dəqiqədə qeyri-etik ifadə və ya hərəkətə (rəsmi şəxsə qarşı qeyri-etik jest) yol verib.
"Ağ-qaralar" forvarda görə 300 manat ödəyəcəklər. Salyanskinin komanda yoldaşı Elcan Əbilov isə ikinci sarıdan qırmızı vərəqə alıb və 1 qarşılaşmanı buraxacaq. Paytaxt təmsilçisi bu səbəbdən 50 manat cərimələnib.
"Neftçi" sarı vərəqə alan 6 oyunçusuna görə 70 manat, Təcili Tibbi Yardım avtomobilinin gecikməsi səbəbindən 100 manat, qarşılaşmadan sonra təhlükəsizlik tam təmin olunmadığından 400 manat ziyana düşüb.
