"Sumqayıt"ın legioneri Masaki Murata müsahibə verib. Sumqayıt24 bu haqda 27 fevral tarixində Sport24.az-a istinadən xəbər verir.
Yapon futbolçu son matçla bağlı fikirlərini bölüşüb, həm də azərbaycanlılarla yaponların fərqindən danışıb. Müsahibəni təqdim edirik:
- Qış fasiləsindən sonra məğlubiyyətsiz seriya yaxalamışdınız. Amma son turda "Qarabağ"a yenildiniz. Rəqibdən, heç olmasa, 1 xal qoparmaq üçün nə çatmadı?
- "Qarabağ"ın gücü hamıya bəllidir. Onlar haqqında əlavə nəsə deməyə ehtiyac yoxdur. Buna rəğmən "süvarilər"lə oyuna yaxşı hazırlaşmışdıq. Məqsədimiz döyüşkən oyun sərgiləmək və Sumqayıta sərfəli nəticə ilə qayıtmaq idi. Qarşılaşmaya yaxşı başladıq. Rəqibi təzyiq altında saxlaya bildik. İlk yarı 0:0 bitəndən sonra da nikbin idik. Fasilədən sonra daha açıq futbol sərgiləyib qol vurmaq istədik. Rəqib isə bundan yararlanıb 2 dəfə bizi məyus edib qələbə qazandı. Pis oynamadıq, amma məğlub olduq.
- Bu məğlubiyyət əhvali-ruhiyyənizi aşağı salmayacaq?
- İstənilən məğlubiyyət təsirsiz ötüşmür. Amma çempionat bir oyundan, bir məğlubiyyətdən asılı deyil. Nikbin olub irəli baxacağıq.
- "Qarabağ" sizdən 18 xal öndədir. Necə düşünürsən, Qurban Qurbanovun komandasını erkən çempionluq münasibətilə təbrik etmək olar?
- Başqa komandanın necə oynaması haqqında danışmaq mənim işim deyil. Hesab edirəm ki, bu bərədə fikir bildirmək, ümumiyyətlə, düz deyil.
- Bir yapon olaraq Azərbaycanda legioner həyatı yaşamaqdan məmnunsan?
- Keysuke Hondadan sonra ölkənizdə top qovan ikinci yaponam. Düşünürəm ki, burada bizi hər şey qane edir. İnsanlarınız ünsiyyətçil və istiqanlıdırlar. Özümüzü Avropadakı kimi hiss edirik.
- Milli yeməklərimizdən favoritlərin hansıdır?
- Yemək çeşidləriniz çox və dadlıdır. Amma daha çox paxlava və yerli dondurmanızı xoşlayıram.
- Səncə, azərbaycanlılar hansı xüsusiyyətlərinə görə yaponlardan fərqlənirlər?
- Biz, yaponlar daha çox utancağıq. Ona görə də emosiyalarımızı gizlətməyə üstünlük veririk. Amma azərbaycanlılar daha özgüvənlidirlər və emosional çıxışları ilə diqqət çəkirlər.
