Sumqayıt sakinlərinin ən sevdiyi hobbilərdən biri də quşbazlıqdır. Şəhərimizin hər məhəllə və mikrorayonunda “Sülh” rəmzi olan göyərçin quşlarını saxlayanlara rast gəlmək olar.
20 ilə yaxındır ki quşbazlıqla məşğul olan bir neçə şəhər sakini ilə həmsöhbət olduq. Onların bu maraqlı məşğuliyyətlə bağlı fikirlərini öyrəndik.
Quşbazların sözlərinə görə, Sumqayıtda, əsasən “Bakı” və “Qara kəkilli İran” göyərçinlərinə rast gəlinir. “Bakı” quşları gündə 10-11 saat uça bilir. Onların maraqlı xüsusiyyətlərindən biri də “salto” yerinə yetirməkdir. “İran” quşları isə onlarla müqayisədə daha az, 5-6 saat uça bilər.
Göyərçinləri əsasən buğda, dənlənmiş qarğıdalı və günəbaxan tumları ilə yedirirlər.
Bütün canlılar kimi, onlar da müxtəlif xəstəliklərə yoluxurlar. Ən ölümcül xəstəlik isə dəliçədir (başgicəllənmə xəstəliyi). Digər xəstəliklərdən isə quşu çox vaxt sağaltmaq mümkün olur.
“Ağıl qanadı deyilən bir deyim var. Belə ki, göyərçinin qanadının başından sayanda 12-13 lələk olduğu halda bala quşu artıq uçurtmaq olar. Bir də əlavə edim ki, 7-8 saat uçan quşları növbəti 2-3 gün ərzində uçurtmaq olmaz. Onların fiziki olaraq özlərinə gəlmələri üçün çox vaxt lazım olur”, - deyə son olaraq həmsöhbət olduğumuz quşbaz əlavə edib.
Qeyd edək ki, bu gün, 1 aprel - Beynəlxalq Quşlar Günüdür. [modula id="12469"]
